ከዘርፉ ይበልጥ ለመጠቀም…

ከዘርፉ ይበልጥ ለመጠቀም…

በምንተስኖት ብርሃኑ

ሠላም ጤና ይስጥልኝ ውድ አንባቢያን እንደምን ከረማችሁ? ኑሮ እንዴት እያደረጋችሁ ነው? በዓላትስ እንዴት ነበሩ? (ገና፣ ጥምቀት እና የመሳሰሉት)፡፡ የዛሬ የጽሑፌ ማጠንጠኛ ለቱሪዝሙ ዘርፍ አስተዋፅኦ ስላላቸው ከሰሞኑ የተከበሩ በዓላት በማንሳት መደረግ አለበት ብዬ የማስበው ምልከታዬን ማጋራት ነው፡፡

እንደሚታወቀው ኢትዮጵያ በምሥራቅ አፍሪካ ካሉ የቱሪስት መዳረሻዎች መካከል ግንባር ቀደም ሃገር ናት፡፡ ሰፊ እና እምቅ የቱሪዝም ባለቤት እንደሆነችም ይነገርላታል። የመስቀል ደመራ፣ ጥምቀት፣ ሸዋል ኢድ፣ የገዳ ሥርዓት፣ ፊቼ ጫምባላላ፣ የመሳሰሉትን በማይዳሰሱ የዓለም ቅርስነት ማስመዝገብ ችላለች፡፡ በሌላ በኩል የስሜን ተራሮች ብሔራዊ ፓርክ፣ የላልይበላ ውቅር ዐቢያተ ክርስቲያን፣ የጎንደር ዐቢያተ መንግሥት፣ የአክሱም ሃውልት፣ የሐረር ጀጎል ግንብ፣ የኦሞ ሸለቆ የከርሰ ምድር ጥናት ስፍራ፣ የጢያ ትክል ድንጋዮች፣ የኮንሶ መልክዓ-ምድር፣ የጌዴኦ ሕዝብ ባህላዊ የመልክዓ-ምድር አያያዝ /ጥምር ግብርና/፣ የካፋ እና ሸካ ጥብቅ ደኖችን ጨምሮ በርካታ የቱሪስት መዳረሻዎች ያሉባት ድንቅ ገር ናት፡፡

በዚህም አሥራ ሦስት የሚሆኑ የሚዳሰሱ እና የማይዳሰሱ ቅርሶች በተባበሩት መንግስታት የትምህርት፣ የሳይንስ እና የባሕል ድርጅት አማካኝነት የዓለም ቅርሶች ሆነው መመዝገባቸውን መረጃዎች ይጠቁማሉ፡፡

እነዚህ ቅርሶችን ጨምሮ በርካታ የተፈጥሮ እና ሰው ሰራሽ መስህቦች ባለቤት የሆነችው ሃገራችን ከዘርፉ ይበልጥ ለመጠቀም መሥራት አለባት፡፡ ይህን የማለቴ ምክንያቱ ለቱሪዝም ማበብ ቀዳሚው እርሾ ሰላም ነውና ሠላሟን ለማስጠበቅ ይበልጥ መስራት ስላለባት ነው፡፡ ምክንያቱም ሰላም በሌለበት አካባቢ ቱሪስቶች (ጎብኝዎች) ሊገኙ አይችሉም፡፡

ከሰሞኑ በተለያዩ አካባቢዎች በድምቀት የተከበረውን የጥምቀት በዓል ጨምሮ ባሕል፣ ትውፊታችንን ለመጎብኘት፣ ቅርሳችንን ተመልክቶ ለመደመም፣ በሆቴሎቻችን አረፍ ብሎ ለመዝናናት፣ ያነበበውን ታሪካችንን በአካል ተገኝቶ ለማረጋገጥ፣ ተፈጥሮ የለገሰችንን ፀጋ በአካል ተገኝቶ ለማድነቅ ቱሪስት (ጎብኝ) ወደ እኛ ሊመጣ የሚችለው ሰላማችን የተረጋገጠ ሲሆን ብቻ ነው፡፡

እርግጥ ነው በዘመነው ዓለም ቱሪዝም በጉብኝት ብቻ የታጠረ አለመሆኑን የተለያዩ ዓለም-አቀፍ መረጃዎች ያሳያሉ፡፡ የትምህርት ቱሪዝም፣ የሕክምና ቱሪዝም፣ የጠፈር ቱሪዝም፣ የጀብድ ቱሪዝም እና መሰል የቱሪዝም ዘርፎችም የሃገር ሀብት ምንጮች ናቸው፡፡

በእኛ ሃገር ኢትዮጵያ ግን የዘመነውን ቱሪዝም ለመጥራት የሚያስችሉ አቅሞች ገና በአግባቡ አልተገነቡም፡፡ በአብዛኛው የቅርስ እና የባህል ቱሪዝም ስለሆነ በሥፋት እየተፈፀመ ያለው ያለ ሠላም ማሳብ ከባድ ነው፡፡

ይሁንና እነዚህንም ገና በአግባቡ እየተጠቀምንባቸው አይደለም፡፡ ማመንጨት የሚችሉትን ሀብት አሟጠን በዘላቂነት እያመነጨን መጠቀም ደረጃ ላይም ገና አልደረስንም፡፡ አሟጠን ለመጠቀም ደግሞ ቀዳሚው ነገር ሰላምን በዘላቂነት ማረጋገጥ ነው፡፡

ሃገር ሰላም ስትሆን በዓላት ይደምቃሉ፡፡ ሀገር ሰላሟ ሲቃወስ በዓላትም፣ ሁለ-ነገራችንም አብሮ ይቃወሳል፡፡ ኢትዮጵያዊያን በዓላትን ስናከብር በጭፈራችንም፣ በምርቃቶቻችንም የሃገር ሰላም መሆን መልካም ምኞትን አጉልተን የምናሳየው ለዚህ ይመስላል፤ “ሀገሩን አማን፣ ቀዬውን ሰላም፣ ገበያውን ጥጋብ አድርግልን!” አይደል ምርቃታችንስ፡፡

ኢትዮጵያዊያን የምናከብራቸው በርካታ ሀይማኖታዊ እና ባህላዊ በዓላቶቻችን አንዳችን ለሌላችን መልካም ምኞታችንንና አብሮነታችንን የምንገልፅባቸው የሰላም ምንጮቻችንም ናቸው፡፡ እነዚህን የሰላም ምንጭ የሆኑ በዓላት የሀብት ምንጭም ማድረግ እንደሚቻል ከሰሞኑ በተከበረው የጥምቀት በዓል ላይ የታየው የቱሪስቶች/ጎብኚዎች ብዛት ማሳያ ነው፡፡

በተለይ እንደ ጥምቀት ያሉ በአደባባይ የሚከበሩ በዓሎቻችን ሰላማዊ እንዲሆኑ ትኩረት ሰጥተን ከሰራን፣ በዓላቱ ለጎብኝዎች ደስታን፤ ለነዋሪዎች ደግሞ ገቢ የሚያስገኙ ይሆናሉ፡፡ ከእነዚህ በዓላት ይበልጥ ለመጠቀም አሰራራችንን ማዘመን ከቻልን፣ የቱሪዝም ገቢያችን የአንድ ወቅት ሳይሆን ዘላቂ እንዲሆን ማድረግ ይቻላል፡፡

በጥር ወር በመላው ኢትዮጵያ በሚከበረው የጥምቀት በዓል ምክንያት የቱሪዝም እንቅስቃሴው የሚነቃቃበት ነው ማለት ይቻላል፡፡ ይህን ወር በላቀ ደረጃ ከተሞቻችን ሊጠቀሙበት ይገባል፡፡ በሁሉም አካባቢ የሚመጡት ጎብኝዎች በየሚደርሱባቸው ከተሞች ገንዘባቸውን አምነው እና ፈቅደው እንዲያፈሱ ምቹ ሁኔታ መፍጠር ያስፈልጋል። መስተንግዷችን ጎብኝዎቻችንን ዳግም እንዲመጡ የሚያደርግ እንዲሆን መሥራት አለብን፡፡

ማረፊያዎቻችንን እና መዝናኛዎቻችንን አቅም በፈቀደ መጠን ምቹ በማድረግ ዛሬ የጎበኙን ጎብኝዎች ነገ ከወዳጅ ዘመዶቻቸው ጋር እንዲመለሱ የሚያማልሉ እንዲሆኑ ሃሳብና አስተያየት በመቀበል ከወዲሁ ለማረም መሥራት የግድ ይላል፡፡

ከማንኛውም ጉዳይ በፊት እንግዶቻችን በመኖሪያ አካባቢያቸው ሲሆኑ የደኀንነት ስሜት እንዲሰማቸው፣ ያለ ሥጋት ወደፈለጉት አካባቢ እንዲንቀሳቀሱ ምቹ ሁኔታ መፍጠር ተገቢ ነው፡፡ ለዚህም ከተሞቻችን አቅም በፈቀደ መጠን ንፁህ ባህላዊ ምግቦች፣ መኝታ፣ መስተንግዶ እና ሌሎች ተዛማጅ አገልግሎቶችን የሚያቀርቡ ሆቴሎችን፣ ምግብ ቤቶችን፣ መዝናኛዎችን እና የመሳሰሉትን ማደራጀት አለባቸው፡፡

እነዚህን ተቋማት ቅንጡ እና ብዙ ሀብት የፈሰሰባቸው አድርጎ ማደራጀት ግድ ላይሆን ይችላል፤ የሚቀድመው እኛን እንዲመስሉ መሥራት ነው፡፡ አካባቢያዊ ምርቶቻችንንም እሴት ጨምረን ለገበያ በማቅረብ አምራቹም፣ ነጋዴውም ተገቢውን የልፋት ዋጋቸውን እንዲያገኙ ማድረግ ጠቀሜታው የጎላ ነው። ለዚህም ነው ሰላሙ የተረጋገጠ አካባቢ እንዲኖረን በጋራ መሥራት ጠቀሜታው ለሁላችንም ነው የምለው፡፡

ሸማ ሠሪው የአካባቢውን መሥህብ ሀብት የሚገልፅ አድርጎ ቢሰራ፣ የግብርና ምርቶችን ለአያያዝ እና አጠቃቀም ምቹ አድርገን ለጎብኝዎች ብንሸጥ፣ የእደ-ጥበብ ውጤቶችን አካባቢያችንን አስታዋሽ አድርገን ብናመርታቸው እና ለገበያ ብናቀርባቸው ቱሪዝማችንን ዘላቂ የገቢ ምንጭ ከማድረግ አንጻር የሚኖረው ሚና የማይናቅ ነው የሚሆነው፡፡

በአጠቃላይ በበዓሎቻችን ወቅት ለጎብኝዎቻችን የምንፈጥረው ምቾት ከበዓል ቀናት ውጭም ለመጎብኘት መነሻ ይሆናሉ፡፡ ይህን ስናሳካ ከተሞቻችን እና መንደሮቻችን ጥርን ሳይጠብቁ የጎብኝዎች መናኽሪያ ይሆናሉና ከሠላሙ ባሻገር ለአገልግሎት አሰጣጣችን ትኩረት በመስጠት ከዘርፉ ይበልጥ ለመጠቀም እንትጋ እያልኩ የዛሬን አበቃሁ፡፡ ሠላም!