የ6 ነጥብ ጨዋታ

የ6 ነጥብ ጨዋታ

ሀዋሳ: ሕዳር 21/2018 ዓ.ም (ደሬቴድ) በ13ኛ ሳምንት የእንግሊዝ ፕሪሚዬር ሊግ በለንደን ደርቢ ቼልሲ ከአርሰናል ዛሬ ምሽት የሚያደርጉት ጨዋታ ከፍተኛ ትኩረት አግኝቷል።

በስታምፎርድ ብሪጅ ስታዲየም የሚካሄደው ጨዋታ ከምሽቱ 1 ሰዓት ከ30 ላይ ይጀመራል።

አርሰናል በ29 ነጥብ በሊጉ የደረጃ ሰንጠረዥ አናት ላይ እንዲሁም ቼልሲ በ23 ነጥብ 3ኛ ላይ በመገኘቱ ተቀራራቢ ነጥብ እና ደረጃን ይዘው ሁለቱ ክለቦች እርስ በእርስ መገናኘታቸው ትኩረትን ስቧል።

ከዚህ ባሻገር ሁለቱም ክለቦች በሳምንቱ አጋማሽ በአውሮፓ ሻምፒዮንስ ሊግ ሁለት ሃያላን ክለቦች ባርሴሎናን እና ባየርንሙኒክን በራስ መተማመናቸውን ከፍ ማድረግ የሚችል ወሳኝ ድል አሳክተዋል።

የሊጉ መሪ አርሰናል በሁሉም ውድድሮች በ16 ጨዋታዎች ባለመሸነፍ በመጓዝ ላይ ይገኛል።

ቼልሲም ቢሆን በጥቅምት እና ህዳር ወር ላይ ካደረጋቸው 11 ጨዋታዎች መኻከል 9 ጨዋታዎችን በማሸነፍ በጥሩ የውጤት ግስጋሴ ላይ ነው።

የምዕራብ ለንደኑ ክለብ ባለፉት 4 ተከታታይ ጨዋታዎች ጎል ሳይቆጠርበት ማሸነፍ ችሏል።

መድፈኞቹ ከቼልሲ ጋር በስታምፎርድ ብሪጅ በተገናኙባቸው የመጨረሻዎቹ 6 ጨዋታዎች አልተሸነፉም።

ሰማያዊዮቹ ከአርሰናል ጋር በተገናኙባቸው ያለፉት 11 ጨዋታዎች መካከል አንድ ጨዋታ ብቻ ነው ማሸነፍ የቻሉት።

በምሽቱ ጨዋታ በመሐል ክፍሉ ላይ ብልጫ ለመውሰድ በአርሰናል በኩል ማርቲን ዙቢሜንዲ እና ዴክላን ራይስ እንዲሁም በቼልሲ በኩል ሞይሴስ ካይሴዶ እና ኤንዞ ፈርናንዴዝ የሚያደርጉት ፊልሚያ አጓጊ ነው።

ለ212ኛ ጊዜ የሚደረገውን የለንደን ደርቢ ጨዋታ የ47 ዓመቱ የእግርኳስ ጨዋታ ዳኛ አንቶኒ ቴይለር በመሀል ዳኝነት ይመሩታል።

ዘጋቢ፡ ሙሉቀን ባሳ