ከ120 ሚሊዮን ብር በላይ በሆነ ወጪ የተገነባው በድርያ ባለ ስድስት ወለል ሁለገብ ህንፃ ተመረቀ

ከ120 ሚሊዮን ብር በላይ በሆነ ወጪ የተገነባው በድርያ ባለ ስድስት ወለል ሁለገብ ህንፃ ተመረቀ

ሀዋሳ፡ ሕዳር 21/2018 ዓ.ም (ደሬቴድ) በወልቂጤ ከተማ ከ120 ሚሊዮን ብር በላይ በሆነ ወጪ የተገነባው በድርያ ባለ ስድስት ወለል ሁለገብ ህንፃ ተመርቆ ለአገልግሎት ክፍት ሆኗል።

ወልቂጤ ከተማን ወደ ዘመናዊ ከተማነት ለመለወጥ በሚደረገው ጥረት ሁሉም ባለድርሻ አካላት አስፈላጊውን ድጋፍና ተሳትፎ እንዲያደርጉ የጉራጌ ዞን ዋና አስተዳዳሪ አቶ ላጫ ጋሩማ ጥሪ አቅርበዋል።

የጉራጌ ዞን ዋና አስተዳዳሪ አቶ ላጫ ጋሩማ በምረቃ ስነስርዓት ላይ ባስተላለፉት መልዕከት በዞኑ የኢንቬስትመንት ዘርፍን በዘላቂነት ውጤታማ ለማድረግ ዘርፈ ብዙ እንቅስቃሴ እየተደረገ መሆኑን ጠቁመው፥ የወልቂጤ ከተማ ሰፊ ዕድል ያላት ስለሆነ፥ ህዝቡ አካባቢውን በማልማት ረገድ የነቃ ተሳትፎ ማድረግ እንዳለበት ተናግረዋል።

የበድርያ ህንፃ ባለቤት ከባለሀብትነት በተጓዳኝ በሰብዓዊ አገልግሎት ላይም እንደሚሳተፍ በመጠቆም ስለሆነም ሌሎች ባለሀብቶች የሱን ተሞክሮ ሊከተሉ እንደሚገባ አስታውቀዋል።

የተመረቀው ህንፃ ለከተማዋ ዕድገት ከፍተኛ አስተዋጽኦ እንዳለው በማንሳት ወልቂጤ ከተማን ወደ ዘመናዊ ከተማነት ለመለወጥ በሚደረገው ጥረት ሁሉም ባለድርሻ አካላት አስፈላጊውን ድጋፍና ተሳትፎ እንዲያደርግ ዋና አስተዳዳሪው መልዕክታቸውነ አስተላልፈዋል።

የወልቂጤ ከተማ አስተዳደር ከንቲባ አቶ ሙራድ ከድር በበኩላቸው ወልቂጤ ከተማ ባላት እምቅ አቅምና ጸጋዎች ልክ አለማደጓን በመጥቀስ ይሁን እንጂ ሀገራዊ ለውጡ የፈጠረውን ምቹ ዕድሎችን በመጠቀም ባለሀብቶችንና ሌሎች ባለድርሻ አካላትን በማሳተፍ በቁጭት ስሜት እየተሰራ እንደሚገኝና በዛሬው ዕለት ተመርቆ ለአገልግሎት ክፍት የሆነው የበድርያ ሁለገብ ህንፃ አንዱ ማሳያ መሆኑን አመላክተዋል።

የወልቂጤ ከተማን ልማት በዘላቂነት ለማረጋገጥ በየደረጃው በሚደረገው ጥረት ሁሉም የድርሻውን እንዲወጣ ከንቲባው ጠይቀዋል፡፡

የበድርያ ሁለገብ ህንፃ ባለቤት ወጣት አብዱልወኪል ታጁ እንደተናገረው ባጭር ጊዜ ተገንብቶ የተመረቀው የባለስድስት ወለል ሁለገብ ህንፃው ደረጃቸውን የጠበቁ የስብሰባ አዳራሽ፣ የባንክ፣ የሱፐርማርኬት፣ የመኝታ፣ የካፌና ሬስቶራንት አገልግሎት የሚሰጡ ክፍሎችን የያዘ ነው።

ህንፃው በተጨማሪም የፓርኪንግ እና የኤሌክትሪክ ተሽከርካሪዎች ቻርጅ ማድረጊያ ቦታዎች እንዳሉት ነው የገለፀው፡፡

ህንፃው ዘርፈብዙ ኢኮኖሚያዊ ጠቀሜታ እንዳለው በመግለፅ ለህንፃ ግንባታው 120 ሚሊዮን ብር ወጪ ስለመደረጉና አሁን ላይ ለ25 ዜጎች ቋሚና ለሌሎችም ጊዜያዊ የሥራ ዕድል መፍጠር መቻሉንም ባለሀብቱ አስረድቷል።

ለባለሀብቱ በኢንቬስትመንት ዘርፍ በመሳተፍ ወልቂጤ ከተማን እንዲያለማ በተደረገ ጥሪ መነሻነት መዋዕለ ንዋዩን በማፍሰስ ወደ ስራ መግባቱን በማንሳት ሌሎች ባለሀብቶችም በዘርፉ በመሳተፍ ከተማዋን እንዲያለሙ ወጣት ባለሀብቱ አብዱል ወኪል ጥሪውን አቅርቧል።

ዘጋቢ፡ መሃመድ ሽሁር – ከወልቂጤ ጣቢያችን