በሴቶችና ህፃናት ላይ የሚደርሱ ጥቃቶችን ለመከላከል በትኩረት እየተሠራ ነው – የጌዴኦ ዞን ሴቶችና ማህበራዊ ጉዳይ መምሪያ
በሴቶችና ህፃናት ላይ የሚደርሱ ጥቃቶችን ለመከላከል በትኩረት እየሠራ መሆኑን በደቡብ ኢትዮጵያ ክልል የጌዴኦ ዞን ሴቶችና ማህበራዊ ጉዳይ መምሪያ አስታወቀ።
መምሪያው ዓለም አቀፍ የህፃናት እና የጸረ-ጾታዊ ጥቃት የነጭ ሪቫን ቀንን በዲላ ከተማ አክብሯል።
በሴቶች ላይ የሚፈፀመውን የኃይል ጥቃትና ሰብአዊ መብት ጥሰት ለመከላከል በዓለም አቀፍ ደረጃ በህዳር ወር የነጭ ሪቫን ቀን ይከበራል።
ዓለም አቀፍ የሕፃናት ቀን በዓለም አቀፍ ደረጃ ለ37ኛ ጊዜ፤ በሀገራችን ደግሞ ለ21ኛ ጊዜ “ትኩረትና እንክብካቤ ለሁሉም ሕጻናት” በሚል እንዲሁም የጸረ-ጾታዊ ጥቃን ቀን በዓለም አቀፍ ደረጃ ለ35ኛ ጊዜ በሀገራችን ደግሞ ለ21ኛ ጊዜ “ለተጎጂዎች ፍትሕ ለወንጀለኞች ተጠያቂነት፤ ለሴቶችና ታዳጊ ሴቶች ደህንነት” በሚል መሪ ቃል እየተከበረ ነው።
በመድረኩ የእንኳን ደህና መጣችሁ መልዕክት ያስተላለፉት የጌዴኦ ዞን ሴቶችና ማህበራዊ ጉዳይ መምሪያ ኃላፊ ተወካይ አቶ አለማየሁ አዶላ፤ በሴቶችና ህፃናት ላይ የሚደርሱ ጥቃቶችን ለመከላከል በየዘርፉ ካሉት አደረጃጀቶች፣ ከሃይማኖትና ባህል ተቋማት፣ የፍትህ ተቋማት እንዲሁም በየትምህርት ቤቱ ከተቋቋሙ ክበባት ጋር የቅድመ መከላከል ሥራ ላይ በትኩረት እየሰሩ መሆናቸውን ገልፀዋል፡፡
በሴቶችና ሕፃናት ላይ የአካልና የስነልቦና ጥቃት ሲፈፀም ከህግ ባለሙያዎች ጋር በመሆን ፍትህ እንዲያገኙ እንደሚሰሩ ጠቅሰው፤ ህጉ በሚደነግገው መሰረት በአጥፊዎች ላይ የእርምት እርምጃ እንዲወሰድ ማድረጋቸውንም አቶ አለማየሁ አብራርተዋል።
በመድረኩ ንግግር ያደረጉት የጌዴኦ ዞን አስተዳዳር ጽሕፈት ቤት ኃላፊ አቶ ዳንኤል ስዩም በበኩላቸው፤ በሴቶችና ህጻናት ላይ ጉዳት እንዳይደርስ የግንዛቤ ማስጨበጫ ትምህርት ሰጥቶ ክትትልና ድጋፍ በማድረግ በርካታ ተግባራት መከናወናቸውን ገልጸዋል።
አክለውም ሴቶችና ሕፃናት ለጥቃት ተጋላጭ ስለሆኑ ይህንን ለመከላከል ሁሉም የበኩሉን ሊወጣ ይገባል ብለዋል።
የበዓሉ ተሳታፊዎች በበኩላቸው፤ በህጻናትና ሴቶች ላይ ጥቃት እንዳይደርስ መጠበቅ የሁሉም ዜጋ ኃላፊነት መሆኑን አንስተው፤ በተለያዩ ጊዜያት የሚፈፀሙ የህግ ጥሰቶችን ለመከላከል የሚመለከታቸው አካላት ከሕብረተሰቡ ጋር በመቀናጀት የበኩላቸውን ኃላፊነት እንዲወጡ ጠይቀዋል።
በበዓሉ ላይ የጌዴኦ ዞን የህጻናት ፓርላማ ተወካዮች፣ የዞን፣ የወረዳና ከተማ አስተዳደር ሴቶችና ማህበራዊ ጉዳይ ጽሕፈት ቤት ኃላፊዎች፣ የህጻናት መብት ማስጠበቂያ ቡድን መሪዎች ተገኝቷል።
ዘጋቢ፡ ውብሸት ኃ/ማርያም – ከይርጋጨፌ ጣቢያችን

More Stories
የመሬት ሀብትን ወደ ካዳስተር ሲስተም አስገብቶ ሀብት በማመንጨት ለአካባቢው ልማት ማዋል እንደሚገባ ተገለፀ
ኢትዮጵያ ወገቧን ጠበቅ አድርጋ ልታሰናዳ የተዘጋጀችው ኮፕ 32 ጉባኤ
21ኛው የብሔር፣ ብሔረሰቦችና ሕዝቦች በዓልን ለማክበር አስፈላጊው ቅድመ ዝግጅት መደረጉን የጌዴኦ ዞን ምክር ቤት አስታወቀ