ማርበርግ ቫይረስን ለመከላከል የሚያስችል የቅድመ ጥንቃቄ ስራ እየተሰራ መሆኑ ተጠቆመ

ማርበርግ ቫይረስን ለመከላከል የሚያስችል የቅድመ ጥንቃቄ ስራ እየተሰራ መሆኑ ተጠቆመ

ሀዋሳ፡ ሕዳር 21/2018 ዓ.ም (ደሬቴድ) ማርበርግ ቫይረስን ለመከላከል የሚያስችል የቅድመ ጥንቃቄ ስራ እየተሰራ መሆኑን የደቡብ ምእራብ ኢትዮጵያ ህዝቦች ክልል ጤና ቢሮ አስታወቀ።

ስለበሽታው አጠቃላይ የግንዛቤ ስራ ለጤና ኤክስቴንሽን ባለሞያዎች እና ለጤና ጣቢያ ኃላፊዎች ስልጠናም የግንዛቤ ማስጨበጫ ሥልጠና ተሰጥቷል።

በቅርቡ የማርበርግ ቫይረስ በሽታ መከሰቱን ተከትሎ ለመከላከል እና የቅድመ ጥንቃቄ ስራ እንደሀገር እየተሰራ መሆኑ ተመላክቷል።

የደቡብ ምእራብ ኢትዮጵያ ህዝቦች ክልል በሽታው የተከሰተበት አከባቢ አጎራባች እንደመሆኑ መጠን ስርጭቱ ቅድሚያ ለመከላከል ግንዛቤ የመፍጠር ስራ መስራት ማስፈለጉን የደቡብ ምእራብ ኢትዮጵያ ህዝቦች ክልል ጤና ቢሮ የበሽታ መከላከል እና ጤና ማጎልበት ዳይሬክቶሬት ዳይሪክተር ዶ/ር እንዳለ ሳህሌ ተናገረዋል።

እስካሁን የቫይረሱ ስርጭት በክልሉ እንዳልተከሰተ የተናገሩት ዶክተር እንዳለ ቢከሰት እንኳ ቅድሚያ መከላከል ለማስቻል እና ስርጭቱ እንዳይስፋፋ ለመቆጣጠር ባለሙያው ወጥ የሆነ ግንዛቤ እንዲኖረው ለመስራት በክልሉ ለሚገኙ ስድስት ዞኖች ውስጥ ላሉ የጤና ኤክስቴንሽን ባለሙያዎች እና የጤና ጣቢያ በኃላፊዎች በቦንጋ እና ሚዛን ማእከል ስልጠና መሰጠቱን ተናግረዋል።

ስለበሽታው ምንነት ስለሚያስከትለው ጉዳት እና መከላከሉ ሂደትን ስልጠናውን ወስደው ለህብረተሰቡ ግንዛቤ ማስጨበጥ እንዲችሉ እንዲሁም ቅኝት እና አሰሳ ስራዎች ለመስራት ስልጠናው መሰጠቱን ገልጸዋል።

ከባለሙያ ባለፈ የሁሉንም የባለድርሻ አካላት ትኩረት የሚሻ ጉዳይ መሆኑን የተናገሩት ዶክተር እንዳለ፥ በተለይ የሀይማኖት አባቶች፣ የሀገር ሽማግሌዎች፣ ወጣቶች፣ ትምህርት ቤቶች፣ በየደረጃው ያሉ የአመራር አካላቶች ለህብረተሰቡ ግንዛቤ በመፍጠር ረገድ ትኩረት ሰጥቶ መስራት አለባቸው።

የበሽታ ምልክት የታየበት ታማሚ ካለም በአፋጣኝ ወደጤና ተቋም እንዲደርስ የማድረግም ስራ መስራት ያስፈልጋልም ብለዋል።

ከግብአት ጋር ተያይዞም የሚነሱ እጥረቶችን ለመፍታት የጤና ተቋማት በተለይ ጤና ጣቢያዎች አስፈላጊውን ግብአት እንዲያደራጁ ከማድረግ ባለፈ በክልሉ ባሉ አስራ አምስት ሆስፒታሎች የቅድመ ዝግጅት ምእራፍ ስራዎች ምልከታ መደረጉን ጠቁመው የቅድመ ዝግጅት ስራዎች መሰራታቸውን አስረድተዋል።

በስልጠናው ላይም የተሳተፉ ባለሙያዎችም ስልጠናው ስለበሽታው አይነት እና የሚያደርሰው ጉዳት እንዲሁም ማድረግ ስለሚገባቸው የቅድመ መከላከል እና የቅኝት ስራዎች ለመስራት በቂ ግንዛቤ ማግኘት መቻላቸውን ተናግረው ወደታች ሲወርዱም የቅድመ መከላከል እና የጥንቃቄ ስራዎችን መስራት እንደሚችሉም ተናግረዋል።

ዘጋቢ: አብዮት ከሚዛን – ከሚዛን ጣቢያችን