ሀዋሳ፡ ሕዳር 21/2018 ዓ.ም (ደሬቴድ) ዞኑ በውሃ ሀብት የበለፀገ ቢሆንም ያለውን ፀጋ ተጠቅሞ ከማልማት አኳያ ያሉ ውስንነቶች ሊቀረፉ እንደሚገባ የጌዴኦ ዞን አስተዳደር አስታወቀ።
በዞኑ ገደብ ወረዳ የሀርሙፎ ቀበሌ አርሶ አደሮችና የተደራጁ ወጣቶች በጥቅል ጎመን እየለማ ያለውን የበጋ መስኖ ኩታ ገጠም እርሻ የጌዴኦ ዞን አስተዳዳሪ ዝናቡ ወልደ (ዶ/ር) በተገኙበት ተጎብኝቷል፡፡
በጉብኝቱ ወቅት የጌዴኦ ዞን አስተዳዳሪ ዝናቡ ወልዴ (ዶ/ር) የአከባቢው አርሶ አደሮች ከቡናና እንሰት ልማት ሥራዎች በተጨማሪ ያሉትን የውሃ ሀብቶች ተጠቅመው የመስኖ ልማት ሥራዎች ላይ የነቃ ተሳትፎ ማድረግ አለባቸው ብለዋል፡፡
ዞኑ በውሃ ሀብት የበለፀገ ቢሆንም ፀጋውን ወደ ልማት ከመቀየር አኳያ በሚፈለገው ፍጥነት አልተጓዝንም ያሉት ዶ/ር ዝናቡ በገደብ ወረዳ የሀርሙፎ ቀበሌ አርሶ አደሮችና የተደራጁ ወጣቶች የአከባቢውን ውሃ ተጠቅመው በበጋ መስኖ በጥቅል ጎመን ምርት ተጠቃሚ ለመሆን እያደረጉ ባሉት ተግባር እጅጉን መኩራታቸውን አስረድተዋል፡፡
የበጋ መስኖ ልማት ሥራው ከአርሶ አደሩ ባለፈ ለአከባቢው ወጣቶች የሥራ ዕድል በር መክፈቱን የጠቆሙት የጌዴኦ ዞን ምክትል አስተዳዳሪና የግብርና መምሪያ ኃላፊ አቶ ተገኝ ታደሰ ምርቱ ደርሶ ወደ ገበያ በሚወጣበት ጊዜ የኢኮኖሚ አቅማቸውን ከማሳደጉም በላይ ገበያውንም ከማረጋጋት ረገድ ከፍተኛ ፋይዳ እንደሚኖረው አስታውቀዋል፡፡
የይህን ተሞክሮ ወደ ሌሎች የዞኑ አከባቢዎች የማስፋፋቱና ተገቢውን የግንዛቤና የግብዓት ድጋፍ ለማድረግ በቁርጠኝነት ይሠራል ያሉት አቶ ተገኝ በዘንድሮው የበጋ መስኖ ልማት ከ10 ሺህ ሄክታር በላይ መሬት በተለያዩ ሰብሎች ለማልማት መታቀዱን አስረድተዋል ፡፡
አርሶ አደር ሰንበቶ አሰፋ ፣ ወጣት ብርሃኑ ባሊ እና ሌሎችም በሀርሙፎ ቀበሌ በአከባቢው ያለውን ውሃ በመጥለፍ ላለፉት ሶስት ዓመታት በኩታ ገጠም እርሻ ጥቅል ጎመን እያመረቱ መሆናቸውን ተናግረዋል፡፡
ምርቱንም ለምግብነት ከመጠቀም ባሻገር ወደ ገበያ በማውጣት ከፍተኛ ገቢ እያገኙ መሆናቸውን የጠቆሙት አርሶ አደሮችና የተደራጁ ወጣቶች እነሱን በማየት በርካቶች ወደ ልማት ሥራው ፊታቸውን እያዞሩ መምጣታቸውን ገልፀዋል፡፡
ዘጋቢ: ሳሙኤል በቀለ – ከይርጋጨፌ ጣቢያችን
More Stories
ከ120 ሚሊዮን ብር በላይ በሆነ ወጪ የተገነባው በድርያ ባለ ስድስት ወለል ሁለገብ ህንፃ ተመረቀ
ማርበርግ ቫይረስን ለመከላከል የሚያስችል የቅድመ ጥንቃቄ ስራ እየተሰራ መሆኑ ተጠቆመ
በሀላባ ዞን 20ኛው የኢትዮጵያ ብሔር፣ ብሔረሰቦችና ህዝቦች ቀን በደማቅ ሁኔታ እየተከበረ ነው