ተተኪ ስፖርተኞችን ለማፍራትና በዘርፉ የገጠመውን ስብራት ለመጠገን የታዳጊ ስፖርተኞችን ተሳትፎ ማሳደግ እና ትኩረት ሰጥቶ መስራት እንደሚገባ የማዕከላዊ ኢትዮጵያዊ ክልል ወጣቶችና ስፖርት ቢሮ አስታወቀ

ተተኪ ስፖርተኞችን ለማፍራትና በዘርፉ የገጠመውን ስብራት ለመጠገን የታዳጊ ስፖርተኞችን ተሳትፎ ማሳደግ እና ትኩረት ሰጥቶ መስራት እንደሚገባ የማዕከላዊ ኢትዮጵያዊ ክልል ወጣቶችና ስፖርት ቢሮ አስታወቀ

በሆሳዕና ከተማ ሲደረግ የቆየው አንደኛው የማዕከላዊ ኢትዮጵያ ክልል መንግስት የታዳጊ ወጣቶች ስልጠና ፕሮግራም የምዘና ውድድር ተጠናቋል።

በመዝጊያው ፕሮግራም ላይ የተገኙት የማዕከላዊ ኢትዮጵያ ክልል ወጣቶና ስፖርት ቢሮ ምክትል ኃላፊና የስፖርት ዘርፍ ኃላፊ አቶ ሰይፈ አለሙ፤ ውድድሩ በክልሉ በስፖርቱ ዘርፍ ያለውን እምቅ አቅም ለመለየት የሚያስችል ከመሆኑ ባሻገር ውድድሩ ክልላዊ አንድነት እና የእርስ በእርስ ትስስር እንዲፈጥር የሚያግዝ መሆኑን ተናግረዋል::

አክለውም ሀገራችን ወደ ለውጥ ሂደት ከገባች በኋላ በስፖርቱ ዘርፍ ተተኪ ስፖርተኞችን ለማፍራት ዕድል የሚሰጥና በዘርፉ የገጠመውን ስብራት ለመጠገን አስተዋጽጾ እንዳለው ጠቁመዋል።

በመዝጊያው እለት በተካሄደው የወንዶች እግር ኳስ ጨዋታ የሳዳትና ከማል አካዳሚ ከስልጤ ዞን ጋር ተገናኝተው መደበኛው የጨዋታ ሰዓት ዜሮ ለዜሮ የተለያዩ ሲሆን ወደ መለያ ምት አምርተው የሳዳትና ከማል አካዳሚ በመለያ ምት 4 ለ 3 በሆነ ውጤት በማሸነፍ የወርቅ ሜዳልያ አሸናፊ ሆኗል፡፡

ስልጤ ዞን የብር፣ የማረቆ ልዩ ወረዳ የነሐስ ሜዳሊያ በማግኘት ውድድራቸውን አጠናቀዋል።

በአጠቃላይ ውድድር ደግሞ ሀዲያ ዞን በ11 ወርቅ፣ 19 ብር እና 6 ነሐስ በበላይነት ሲያጠናቅቅ፤ የቀቤና ልዩ ወረዳ በ10 ወርቅ፣ 6 ብር እና 2 ነሐስ 2ኛ፤ ምስራቅ ጉራጌ ዞን በበኩሉ 7 ወርቅ፣ 5 ብር እና 2 ነሐስ በማግኘት 3ኛ በመሆን ወድድሩን አጠናቋል፡፡ በስፖርታዊ ጨዋነት ደግሞ የም ዞን የዋንጫ ተሸላሚ ሆኗል።

በዚህ ውድድር ብቁ የሆኑ አትሌቶች ከጥር 27/2017 ጀምሮ በደቡብ ኢትዮጵያ ክልል አስተናጋጅነት በወላይታ ዞን ሶዶ ከተማ በሚደረገው ሀገር አቀፍ የታዳጊ ወጣቶች ስልጠና ፕሮግራም የምዘና ውድድር ላይ ክልሉን በመወከል የሚሳተፉ ሲሆን ለውድድሩ መሳካት አስተዋጽኦ ያደረጉ አካላትን የቢሮው ምክትል ኃላፊ አመስግነዋል።

በመዝጊያው ከክልልና ከዞን ጥሪ የተደረገላቸው ከፍተኛ የመንግስት አካላት፣ የዞንና የልዩ ወረዳ ተወካዮችና ልዑካን የሆሳዕና ከተማ የስፖርት ቤተሰብ ውድድሩን በማድመቅ ፍጻሜውን አግኝቷል።

ዘጋቢ፡ ሄኖስ ካሳ – ከሆሳዕና ጣቢያችን