የጤናው ዘርፍ ተግባራት በኃላፊነት እና በቅንጅት ሊሰራ እንደሚገባ ተገለጸ

‎

‎የጤና ተግባራት በኃላፊነት እና በቅንጅት ሊሰራ እንደሚገባ የይርጋጨፌ ወረዳ ጤና ጽ/ቤት ኃላፊ አቶ ተካልኝ ጥላሁን ገለጹ።

የፒ.ኤስ.አይ ኢትዮጵያ መንግስታዊ ያልሆነ ድርጅት ከይርጋጨፌ ጤና ጥበቃ ጽ/ቤት ጋር በመተባበር “የማህበረሰብ ተሳትፎ ለጤና” በሚል መሪ ሀሳብ ከባለድርሻ አካላት ጋር የውይይት መድረክ አካህዷል።

‎

‎በመድረኩ ተገኝተው መልዕክት ያስተላለፉት የይርጋጨፌ ወረዳ ጤና ጽ/ቤት ኃላፊ አቶ ተካልኝ ጥላሁን፥ የጤና ተግባር ሁሉም ሴክተሮች በኃላፊነት እና በቅንጅት የሚሠሩት ሊሆን እንደሚገባ አሳስበዋል።

‎

እናቶች በጤና ተቋም እንዲወልዱ ከቅድመ ወሊድ ጀምሮ እስከ ድህረ ወሊድ ያለውን ጊዜ ክትትል እንዲያደርጉ በስፋት መሰራት እንዳለበት አቶ ተካልኝ አንስተዋል።

‎

‎አምራች ዜጋን ለማፍራት የህጻናት መቀንጨር ትልቅ ማነቆ መሆኑን የገለፁት ኃላፊው፥ ለብሩህ አእምሮ እና ዕድገት የተመጣጠነ ምግብ ማግኘት አለባቸው ብለዋል።

‎

‎በፒ.ኤስ.አይ ኢትዮጵያ የደቡብ ኢትዮጵያ ክልል አስተባባሪ ዶ/ር ታምራት ተስፋዬ፣ ድርጅቱ በርካታ ስራዎችን ሲሰራ መቆየቱን አንስተው፥ በእናቶች እና ህጻናት ጤና እና በስርዓተ ምግብ ፕሮግራም ለመዘርጋት እና ማስተዋወቂያ የውይይት መድረክ መሆኑን ጠቁመዋል።

‎

‎በወረዳው ለሁለት ዓመታት እንደሚቆይ ያነሱት አስተባባሪው፥ በቆይታ ጊዜያቸውም በስርዓተ ምግብ፣ በእናቶች እና ህጻናት ጤናና ሌሎች የጤና አመለካከቶች ላይ ግንዛቤ የማስጨበጥ ስራ እንደሚሰራ ገልጸዋል።

‎

‎የይርጋጨፌ ወረዳ ምክትል አስተዳዳሪ አቶ ተካልኝ በቀለ በበኩላቸው፣ የማህበረሰብ ጤና ልማትን ለማረጋገጥ ዘርፈ ብዙ ተግባራት እየተሰሩ መሆናቸውን ገልጸው፥ ድርጅቱ የማህበረሰቡን የጤና ችግር ለመቅረፍ ላደረገው አስተዋጽኦ አመስግነዋል።

‎

‎አስተያየታቸውን የሰጡ የውይይቱ ተሳታፊዎች በበኩላቸው፥ ዉይይቱ አስፈላጊ መሆኑን በመግለጽ የህብረተሰቡን ጤና ለመጠበቅ በቅንጅት እንደሚሰሩ ተናግረዋል።

‎

‎ዘጋቢ፡ አሀዱ አሸናፊ – ከይርጋጨፌ ጣቢያችን