ሀገራዊና ክልላዊ አንድነትን የሚጎዱ ጉዳዮችን ለመቅረፍ የፖለቲካ አመራሩ ትኩረት ሰጥቶ መስራት እንደሚገባው ተገለፀ

ሀዋሳ፡ ጥር 07/2012 ዓ.ም (ደሬቴድ) ሀገራዊና ክልላዊ አንድነትን የሚጎዱ ጉዳዮችን ለመቅረፍ የፖለቲካ አመራሩ ትኩረት ሰጥቶ መስራት እንደሚገባው የደቡብ ክልል ምሁራን በሆሳዕና ከተማ ባደረጉት የምክክር መድረክ ላይ ተገልጿል::

በዶክተር ተካልኝ አያሌው በቀረበው ጥናታዊ ጽሁፍ ላይ ከምሁራንና ከዩኒቨርሲቲ መምህራን የተለያዩ ሀሳቦች ቀርበዋል::

ከተሳታፊዎች ከተነሱ ጉዳዮች መካከል ህገ መንግስቱ የሚያጋጭና የሚበታትን ከሆነ መንግስት ለጉዳዩ ትኩረት ሰጥቶና ህዝቡን በማሳተፍ ማሻሻል እንደሚኖርበት ተገልጿል::

የክልል አደረጃጀት ህዝቡን በሚጠቅም መልኩ ያለመደራጀቱ ተገልጾ ፍትሃዊ የሀብት ክፍፍል በደቡብ ክልል ያለመኖሩ የደቡብ ክልልን በአንድነት ለማስቀጠል እንቅፋት መፍጠሩን በውይይት መድረኩ ተነስቷል::

የፓርቲና የመንግስት መደበላለቅ እንዳለና የሁለቱን አሰራሮች የመለያየት ስራ መስራት እንደሚገባ ከተሳታፊዎች ሃሳብ ተሰንዝሯል::

በዓለም አቀፍ ደረጃ ጭምር የተመሰከረለት ሀገራዊ ለውጥ እንዳይቀለበስ ምሁራን የራሳቸውን አስተዋጽኦ ሊያበረክቱ እንደሚገባም ተመላክቷል::

ይህን መሰል የምሁራን ውይይት መዘግየቱ፣ ምሁራን አቅማቸውን አውጥተው እንዳይጠቀሙ በክልሉ መገፋፋት መኖሩና ክልሉ ምሁራንን በአግባቡ መጠቀም ያለመቻሉ ተጠቁሟል::

የክልል አደረጃጀት የህዝብ ጥያቄ መሆኑ ተነስቶ ክልሉን በበላይነት የሚመራው ፓርቲ በጥናት ያስቀመጠው አቅጣጫ የህዝቦችን ጥያቄ መሰረት ያደረገ እንዳልሆነ በውይይቱ ተነስቷል::

ብሔርች፣ ብሔረሰቦችና ህዝቦች በሚባሉ ጉዳዮች ላይ ግልጽ ፍቺ መኖር እንደሚገባም በውይይቱ ተገልጿል፡፡

ከተሳታፊዎች ለተነሱ ጥያቄዎች ማብራሪያ የሰጡት የአዲስ አበባ ዩኒቨርሲቲ መምህር ዶክተር ተካልኝ አያሌውና የጂንካ ዩኒቨርሲቲ ፕሬዝዳንት ፕሮፌሰር ገብሬ ይንትሶ ናቸው::

ዶክተር ተካልኝ አያሌው የመዋቅር ጉዳይ ህገ መንግስታዊ ጥያቄ መሆኑን ተናግረው በመጀመሪያ በጋራ ጉዳዮች ላይ መግባባት ተገቢ እንደሆነ ተናግረው የመዋቅር ጥያቄን ወደ ስራ ለማስገባት አዳጋችና መቆሚያ የሌለው መሆኑን ተናግረዋል::

የሚነሱ ጥያቄዎች ዘመኑን ግምት ውስጥ ባስገባ መልኩ መሆን እንደሚገባቸው የተናገሩት ደግሞ የጂንካ ዩኒቨርሲቲ ፕሬዝዳንት ፕሮፌሰር ገብሬ ይንትሶ ሲሆኑ ጥያቄዎች ሲጠየቁ በሰላማዊ መንገድ መፈታት እንደሚኖርባቸው ገልጸዋል::

በምክክር መድረኩ ሌላ የመወያያ ጥናት ጽሁፍ ቀርቦ ውይይት የሚደረግ ሲሆን የውይይት መድረኩ በነገው ዕለት ይጠናቀቃል ተብሎ ይጠበቃል::
ዘጋቢ፡ ፋሲል ኃይሉ