መገናኛ ብዙሃን ለውጡ የፈጠረላቸውን ነፃነት በአግባቡ እየተጠቀሙ አይደለም ተባለ

ሀዋሳ፡ ጥቅምት 24/2012 ዓ.ም (ደሬቴድ) በሃገሪቱ የሚገኙ የመገናኛ ብዙሃን ለውጡ የፈጠረላቸውን ነፃነት በአግባቡ እየተጠቀሙ አለመሆኑን የብሮድካስት ባለስልጣን አስታወቀ።

ባለስልጣኑ የሩብ አመት አፈፃፀሙን በህዝብ ተወካዮች ምክር ቤት ለህግ፣ ፍትህና ዴሞክራሲ ጉዳዮች ቋሚ ኮሚቴ አቅርቦ ውይይት እየተካሄደበት ይገኛል፡፡

በባለስልጣኑ ሪፖርት የመገናኛ ብዙሃኑ በተለይም በ2011 ዓ.ም ለውጡ በሚፈለገው የህግ መስመር የመስራት ክፍተት እንደተስተዋለባቸው ተመልክቷል፡፡

ተቋሙ የመገናኛ ብዙሃኑ ለሚፈለገው አሰራር ተገዢ እንዲሆኑ ያለውን ስልጣን ለመጠቀም የፋይናንስና የባለሙያ ችግር አለብኝ ብሏል።

ይሁንና መንግሥት ከልካይነትን በማስወገድና ለመገናኛ ብዙሃኑ አስቻይ ሁኔታዎችን ለመፍጠር አስቦ ፈጣን እርምጃዎች ከመውሰድ ቢዘገይም ኃላፊነት በጎደለው የአዘጋገብ ቅርፅ የብልሽት ስፋቱም በዛው ልክ እየጨመረ መጥቷልም ብሏል ባለስልጣኑ።

ሃገሪቱ ለገጠማት ችግር የጥቂት መገናኛ ብዙሃን ሚና የማረጋጋት ሳይሆን አባባሽ እንደነበረም ጠቁሟል።

ሆኖም ለችግሩ ብቸኛ መፍትሔ እነዚህን የመገናኛ ብዙሃን መዝጋት የሚለው ባለመሆኑ ተቋማቱ የህግን መስመር እንዲከተሉ ብቻ የማድረግ ስራ መስራት እንደነበርም ጠቅሷል።

ከዚህ ቀደም ይወሰድ የነበረው እርምጃ በመገናኛ ብዙሃን አዋጅ ላይ ብቻ የተመሰረተ ስላልነበረ የተሻለ የእርምጃ አወሳሰድ ስርዓትን ለመከተል ሲባል ትዕግስት መመረጡንም ነው የገለፀው።

ይሁን እንጅ አሁን በማይሻሻሉት የመገናኛ ብዙሃን ላይ ወጥ እርምጃ ለመውሰድ እንደሚገደድም ገልጿል። (ኤ.ቢ.ሲ)