የምግብ ዋስትናን ለማረጋገጥ በትኩረት እየተሰራ ነው - ፕሬዝዳንት ሣህለ ወርቅ

ሀዋሳ፡ መስከረም 16/2012 ዓ.ም (ደሬቴድ) በኢትዮጵያ የምግብ ዋስትናን ማረጋገጥ ቅድሚያ ከሚሰጣቸው የልማት ተግባራት አንዱ በማድረግ ትኩረት ተሰጥቶ እየተሰራበት መሆኑን ፕሬዝዳንት ሣህለ ወርቅ ዘውዴ ገለጹ፡፡

በኢትዮጵያ በህጻናት ላይ የሚታየውን የመቀንጨር ችግር ለመፍታት የተቀረጸው የሰቆጣ የውሳኔ ሃሳብ ላይ የሚመክረው ጉባኤ በኒውዮርክ ተካሂዷል፡፡

በዚህ መድረክ ላይ ንግግር ያደረጉት ፕሬዝዳንት ሣህለ ወርቅ ዘውዴ እንዳሉት ኢትዮጵያ ባለፉት 16 ዓመታት የህጻናት መቀንጨርን በ20 በመቶ መቀነስ ችላለች፡፡

ከአንድ ዓመት በፊት የጸደቀው የምግብና የስርዓተ ምግብ ፖሊሲ መቀንጨርን ለመከላከል የተቀረጸውን የሰቆጣን የውሳኔ ሀሳብ ተግባራዊ ለማድረግ ቀልፍ እርምጃ ነው ብለዋል፡፡

ችግሩን ለመቅረፍም ከሁሉም አጋሮች ጋር ተባብሮ ለመስራት ኢትዮጵያ ያላትን ቁርጠኝነት የገለጹት ፕሬዝዳንት ሣህለ ወርቅ ዘውዴ አጋር አካላትም ድጋፋቸውን የበለጠ አጠናክረው እንዲቀጥሉ ጥሪ አቅርበዋል፡፡

በስብሰባው ላይ የተሳተፉት አጋሮች በበኩላቸው እስካሁን የተገኘው ውጤት አበረታች መሆኑን ነው ያመለከቱት፡፡

በቀጣይም በሰቆጣ የውሳኔ ሀሳብ ላይ የተቀመጡት ግቦች እንዲሳኩ ከኢትዮጵያ መንግስት ጋር በቅርበት እንደሚሰሩ አረጋግጠዋል፡፡

ጥናቶች እንደሚጠቁሙት በኢትዮጵያ 38 በመቶ የሚሆኑት ህጻናት የመቀንጨር ችግር ያጋጥማቸዋል፡፡

ምንጭ፡- የፕሬዝዳንት ጽ/ቤት