በሀዲያ ዞን ዱና ወረዳ በ5 ሚሊዮን ብር ወጪ የተገነቡ አራት ድልድዮች ተመረቁ
በአካባቢው ተወላጅ ባለሀብት በአቶ አዳምሰገድ ዱናሞ እና በባለቤታቸው ሊሊአዳም ጌታሁን በሀዲያ ዞን ዱና ወረዳ በ5 ሚሊዮን ብር ወጪ የተገነቡ አራት ድልድዮች ተመረቁ፡፡
የአካባቢው ነዋሪዎች በበኩላቸው የዘመናት ጥያቄ የነበረው የድልድይ ግንባታ ተጠናቆ ለአገልግሎት በመብቃቱ መደሰታቸውን ተናግረዋል።
በምረቃ ሥነሥርዓቱ የተገኙት የሀድያ ዞን ዋና አስተዳደሪ አቶ ማቴዎስ ሎምበሶ እንደተናገሩት የአንድ ሀገር ዕድገት የሚረጋገጠው በመንግሥት ብቻ ስላልሆነ የባለሀብቶች ድርሻ የላቀ ነው ብለዋል።
ዋና አስተዳዳሪው አክለውም በአሁኑ ወቅት መንግስት የተለያዩ የልማት ሥራዎችን እያከናወነ ሲሆን በመንግሥት ያልተሸፈኑ ተግባራት በእንዲህ ዓይነት ሁኔታ በባለሀብቶች መሸፈናቸው የሚበረታታ አንደሆነ አመላክተዋል።
ባለሀብቱ የአካባቢው ህብረተሰብ የዘመናት ጥያቄ ሆኖ የቆየው የመንገድና የድልድይ ችግር እንዲፈታ ላደረጉት አስተዋጽኦ አመስግነው ሌሎችም የእሳቸውን ፈለግ እንዲከተሉ ጥሪያቸውን አስተላልፈዋል።
የዱና ወረዳ ዋና አስተዳዳሪ አቶ ብርሃኑ አበራ በበኩላቸው አካባቢው ለጎርፍ ተጋላጭ በመሆኑ በማህበረሰቡ የሚያደርሰውን ተፅዕኖ ከግንዛቤ ውስጥ በማስገባት ባለሀብቱ በራሳቸው ወጪ አራት ድልድዮች ተገንብተው በማስረከባቸው ሊመሰገኑ ይገባል ብለዋል።
ድልድዮቹን ያስገነቡት አቶ አዳምሰገድ ዱናሞ እንደተናገሩት ነዋሪነቴ በአካባቢው የሚስተዋለው የመንገድና የድልድይ ችግር በወላድ እናቶችና በሌሎችም የህብረተሰብ ክፍሎች የሚያደርሰው እንግልት ከፍተኛ መሆኑ ድልድዮቹን ለማስገንባት አነሳስቶኛል ብለዋል።
ለድልድዮቹ ግንባታ 5 ሚሊዮን ብር ወጪ እንዳደረጉ የጠቆሙት አቶ አዳምሰገድ በቀጣይም ህብረተሰቡን ተጠቃሚ የሚያደርጉ የችፑድ ፋብርካና የእህል ወፍጮ አገልግሎት ሥራ ለማስጀመር ዝግጁ መሆናቸውን አረጋግጠዋል።
የአካባቢው ነዋሪዎች በበኩላቸው የዘመናት ጥያቄ የነበረው የድልድይ ግንባታ በባለሀብቱ በኩል ተገንብቶ ለአገልግሎት በመብቃቱ መደሰታቸውን ገልፀዋል።
ዘጋቢ፡ በየነ ሰላሙ ከሆሳዕና - ጣቢያችን